युएईले खोप लगाएका सबै विदेशीलाई यात्रा अनुमति दिने

दुबई । संयुक्त अरब इमिरेट्सले सोमबारदेखि कोभिडविरुद्ध पूर्ण खोप लगाएका सबै पर्यटकका लागि भिसा जारी गर्ने घोषणा गरेको छ । दुबईले ढिलो गरी सञ्चालन हुन लागेको व्यापार प्रदर्शनी २०२० आयोजना गर्नुभन्दा एक महिनाअघि विदेशी पर्यटकका लागि भिसा दिने घोषणा गरेको हो ।

दुबईले गत वर्ष ६ महिने ‘दुबई एक्स्पो २०२०’ मार्फत लाखौं विदेशी आकर्षित गर्ने र अर्थ व्यवस्थालाई सुदृढ पार्ने योजना ल्याएकोमा स्वास्थ्य संकटले एक वर्ष ढिलो गरी अक्टोबरमा यसको आयोजना गर्न लागेको हो ।

गत सप्ताहन्तमा २४ घन्टाको अवधिमा महिनौंपछि एक हजारभन्दा कम संक्रमित भेटिएको र यो नियन्त्रणको दिशातिर गएको भन्दै युएईले व्यापारिक तथा पर्यटकीय गतिविधिमार्फत महामारीका कारण थला परेको अर्थतन्त्रलाई उकास्न कोभिड–१९ नियन्त्रणका लागि लिइएका प्रतिबन्धात्मक उपायहरूलाई क्रमशः अन्त्य गर्दै जाने निष्कर्षमा पुगेको यहाँको समाचार संस्था डब्लुएएमले अधिकारीलाई उद्धृत गरी समाचार लेखेको छ ।

भिसा पाउनका लागि विश्व स्वास्थ्य संगठनद्वारा अनुमोदित एस्ट्राजेनेका, जोन्सन एन्ड जोन्सन, मोडेर्ना, फाइजर, सिनोफार्म र सिनोभ्याक नामक कोभिड–१९ विरूद्धका खोपमध्ये कुनै एक खोपको पूर्ण मात्रा लगाएको हुनुपर्नेछ ।

यो निर्णय पहिले प्रतिबन्धित देशहरूबाट आएका लगायत सबै देशका नागरिकमा लागू हुने डब्लुएएमले जनाएको छ । यद्यपि पर्यटक भिसामा आउने यात्रुले विमानस्थलमा अनिवार्य पिसिआर परीक्षण गर्नुपर्नेछ । कोभिड महामारीको बीचमा देशको जीवन धेरै हदसम्म सामान्य भएको भए पनि यसले मास्क लगाउने र सामाजिक भेलासम्बन्धी कडा नियमहरू लागू गरिरहेको छ ।

युएईमा हालसम्म सात लाख १५ हजार व्यक्तिमा कोभिड–१९ संक्रमण पुष्टि भएको छ भने दुई हजार ३६ संक्रमितको मृत्यु भएको सरकारी तथ्यांकमा जनाइएको छ ।